فیروزوالا( نامہ نگار) لاہور روڈ کی آبادی منڈھیالی کے قریب فیکٹری میں آتشزدگی کے دوران 4مزدور جھلس کر زخمی ہو گئے جن کو طبی امداد کیلئے ہسپتال داخل کرا دیا گیا۔ فیکٹری میں آگ لگنے سے تقریباً ایک کروڑ روپے کا سامان جل گیا۔ بتایا گیا ہے کہ منڈھیالی کے قریب واقع کیمیکل انڈسٹری میں سٹیم لائن پھٹنے کی وجہ سے آگ لگ گئی جس سے بجلی کی تاریں آگ سے ٹوٹ پھوٹ گئیں اور مشینری پر جا گریں جس کے نتیجہ میں کام کرتے ہوئے چار مزدور محمد اعجاز، محمد احمد، عرفان اور اصغر بری طرح جھلس گئے ۔واقع کی اطلاع ملتے ہی ضلعی انتظامیہ موقع پر پہنچ گئی جنہوں نے تحقیقات شروع کر دیں۔