قومی سکوائش کھلاڑی سیمی فائنل میں داخل ویٹ لفٹر کی پانچویں پوزیشن 

لاہور ( سپورٹس رپورٹر) کامن ویلتھ گیمز میں سکواش کورٹ سے اچھی خبر آگئی، قومی کھلاڑی فائزہ ظفر نے سیمی فائنل تک رسائی حاصل کر لی۔برمنگھم میں جاری میگا ایونٹ میں ویمن سکواش کوارٹر فائنل میچ میں پاکستانی کھلاڑی فائزہ ظفر نے گیانا کی آشلے خلیل کو شکست دے کر اگلے مرحلے کے لئے کوالیفائی کرلیا۔فائزہ ظفر کا سیمی فائنل میں سامنا آج بھارتی حریف سنینا سارا کرو ویلا سے ہوگا۔دوسری جانب ویٹ لفٹنگ کے 81 کے جی کیٹگری میں پاکستانی ویٹ لفٹر حیدر علی ناکام ہو گئے۔ویٹ لفٹرحیدر علی نے اسنیچ اور کلین اینڈ جرک میں 305کلو گرام وزن اٹھا کر پانچویں پوزیشن لی۔اس کیٹگری میں انگلینڈ نے سونے، آسٹریلیا نے چاندی اور کینیڈا نے کانسی کا تمغہ لیا۔حیدر علی کے آﺅٹ ہونے کے بعد ویٹ لفٹنگ میں کل نوح بٹ اور ہنزلا دستگری ایکشن میں ہوں گے۔نوح بٹ 109 پلس کے جی میں حصہ لے رہے ہیں جبکہ ہنزلا دستگری 109 کے جی میں ایکشن میں ہوں گے۔جبکہ پاکستانی باکسر الیاس حسین فیدر ویٹ کے کوارٹر فائنل میں پہنچ گئے۔الیاس حسین نے ٹرینیڈاڈ اینڈ ٹوباگو کے باکسر کو 2-3 سے شکست دے کر کوارٹر فائنل میں جگہ بنائی۔فیدرویٹ کے کوارٹر فائنل میں الیاس حسین کا مقابلہ ناردرن آئرلینڈ کے باکسر سے ہوگا۔