گورنر پنجاب سے15 گولڈ میڈلز جیتنے والی سہیل سسٹرز کی ملاقات،تعریفی اسناددیں 

لاہور(نیوز رپورٹر)گورنر پنجاب سردار سلیم حیدر خان سے گورنر ہائوس لاہور میں ایشین پیسیفک افریکن کمبائنڈ پاور لفٹنگ چیمپئن شپ میں 15 گولڈ میڈلز جیتنے والی ورلڈ ریکارڈ ہولڈرز سہیل سسٹرز کی مینارٹی ونگ پنجاب کے نائب صدر ایڈون سہوترا کی قیادت میں ملاقات کی۔ اس موقع پرٹوئنکل سہیل، ویرانیکا سہیل، سائبل سہیل، مریم سہیل، منیجر سہیل جاوید کھوکھر،کوچ ملک محمد راشد اور عاصم عدنان بھی موجود تھے۔ ملاقات کے دوران ٹوئنکل سہیل نے اپنا گولڈ میڈل شہید بینظیر بھٹو کے نام کرنے کا اعلان بھی کیا۔ گورنر پنجاب سردار سلیم حیدر نے کہا کہ تینوں بہنوں ٹوئنکل سہیل، ویرانیکا سہیل، سائبل سہیل نے ملک کی تاریخ میں پہلی دفعہ 3 براعظموں کے پاور لفٹنگ کے مقابلے میں 15 گولڈ میڈلز جیت کر ملک کا نام روشن کیا۔ بین الاقوامی سطح پر ملک و قوم کا نام روشن کرنیوالے کھلاڑی قوم کے ہیرو اور ملک کا اثاثہ ہیں۔ امید ہے پاورلفٹنگ کھلاڑی محنت کر کے اولیمپکس کیلئے بھی کوالیفائی کریں گی اور ملک کا نام روشن کریں گی۔ ٹوئینکل سہیل نے کہا شہید بینظیر بھٹو  پاکستانی خواتین کیلئے ایک رول ماڈل تھیں۔ بینظیر بھٹو نے پہلی خاتون وزیراعظم بن کر ثابت کیا کہ خواتین محنت اور جذبے سے معاشرے میں بلند مقام حاصل کر سکتی ہیں۔ آخر میں گورنر پنجاب نے کھلاڑیوں کو تعریفی اسناد دیں اور ان کی کارکردگی کو سراہا۔