کوٹ عبدالمالک: منشیات فروشوں سے تصادم‘ تھانیدار سمیت 3 اہلکاروں کی وردیاں پھٹ گئیں

فیروزوالہ (نامہ نگار) پولیس چوکی کوٹ عبدالمالک کے قریب منشیات فروشی کے کئی برس پرانے اڈا پر چھاپہ مارنے پر پولیس اور منشیات فروشوں کے گروہ کے درمیان تصادم ہو گیا۔ تفصیلات کے مطابق فیکٹری ایریا پولیس نے جمال ٹاؤن میں چھاپہ مار کر لیڈی منشیات فروش کوثر المعروف چٹو کو گرفتار کیا تو اس کے بیٹے سمیت 15 افراد نے پولیس پر حملہ کر کے کوثر بی بی کو چھڑوانے کی کوشش کی تو لڑائی شروع ہو گئی۔ پولیس نے ملزم وسیم اور حنیف سمیت پندرہ افراد کے خلاف مقدمہ درج کر لیا ہے اور کوثر عرف چٹو کو چھڑوانے کی کوشش ناکام بنا دی ہے۔ ایس ایچ او فیکٹری ایریا رانا سجاد اکبر کے مطابق پکڑی خاتون کے قبضہ سے چرس برآمد کر لی گئی۔ لڑائی جھگڑے میں تھانیدار سمیت 3 اہلکاروں کی وردیاں پھٹ گئیں۔