اسلام آباد ہائی کورٹ نے رہنما پاکستان تحریک انصاف اور سینیٹ میں قائد حزب اختلاف شبلی فراز کا نام ایگزٹ کنٹرول لسٹ (ای سی ایل)سے نکالنے کا حکم دے دیا۔جسٹس طارق محمود جہانگیری نے شبلی فراز کی بیرون ملک جانے کی پابندی سے متعلق درخواست پر سماعت کی۔اس موقع پر شبلی فراز اپنے وکیل کے ہمراہ عدالت پیش ہوئے۔وکیل درخواستگزار نے کہا کہ 4 ایف آئی آرز ہیں، سب میں ضمانت پر ہیں، جس پر عدالت نے سرکاری وکیل سے استفسار کیا کہ اب کیا گرائونڈ ہے۔سرکاری وکیل نے موقف اپنایا کہ جو عدالت حکم کرے گی ہم عمل کریں گے، جسٹس طارق محمود جہانگیری نے ریمارکس دیئے کہ وزارت داخلہ اور ڈی جی پاسپورٹس عدالت کو مطمئن نہیں کرسکے۔عدالت نے حکم دیا کہ ایک ہفتہ میں نام ای سی ایل سے نکال کر عدالت میں رپورٹ پیش کرنے جائے، مزید حکم دیا کہ ڈی جی پاسپورٹ اور ڈی جی ایف آئی اے عملدرآمد رپورٹ پیش کریں۔