پی آئی اے نے صلالہ کےلئے پروازیں شروع کر دیں

کراچی(اسٹاف رپورٹر)پی آئی اے نے آج سے عمان کے شہر صلالہ کےلئے پروازوں کا آغاز کر دیا ہے۔ پہلی پرواز PK235 آج لاہور سے دوپہر 12.30 پر روانہ ہوئی۔ صلالہ کے لئے ہفتہ وار 2 پروازیں جمعرات اور اتوار کے روز لاہور سے براہ راست روانہ ہوا کریں گی۔ ترجمان پی آئی اے کے مطابق پی آئی اے پہلے ہی مسقط کےلئے پروازیں چلا رہی ہے ،ان 2 نئی ہفتہ وار پروازوں کے اضافہ سے پی آئی اے کے مسافروں کو براہ راست سفر کی سہولت میسر آئے گی اور دونوں ممالک کے درمیان تعلقات کو مزید فروغ حاصل ہو گا۔ اس موقع پر پی آئی اے کے چیف ایگزیکٹو آفیسر برنڈ ہلڈن برانڈ نے اپنے خیالات کا اظہار کرتے ہوئے کہا ہے کہ پی آئی اے اپنے طیاروں میں اضافہ کر کے منافع بخش روٹس اور خاص طور پر ان مقامات کےلئے پروازیں چلا رہی ہے جہاں پر پاکستانی مقیم ہیں۔
پی آئی اے/ پروازیں