کراچی (سٹاف رپورٹر) سابق صدر آصف علی زرداری نے پٹرولیم مصنوعات کی قیمتوں میں اضافے پر ہدایت کی ہے کہ پارٹی پارلیمنٹ میں بھرپور احتجاج کرے، ارکان پٹرولیم مصنوعات کی قیمتوں میں اضافے کا معاملہ اٹھائیں۔ علاوہ ازیں آصف علی زرداری نے کہا ہے کہ پاکستان پیپلزپارٹی محترمہ بینظیر بھٹو شہید کے نظریے پر عمل پیرا ہے۔ معاشرے میں عزت اور وقار خواتین کا حق ہے۔ پیپلزپارٹی خواتین کو یہ حق ضرور دلائے گی۔ زرداری ہائوس اسلام آباد میں سابق وفاقی وزیر نیلوفر بختیار نے آصف علی زرداری سے ملاقات کرکے پاکستان پیپلزپارٹی میں شمولیت کا اعلان کیا۔ نیلوفر بختیار نے کہا کہ میرے والدین کا تعلق پیپلزپارٹی سے تھا۔ میں واپس اپنے گھر آئی ہوں۔ آصف علی زرداری نے کہا کہ پیپلزپارٹی ایک گھر ہے جہاں مائوں، بہنوں اور بیٹیوں کی عزت کی جاتی ہے۔ فریال تالپور، بختاور بھٹو اور آصفہ بھٹو چیئرمین بلاول بھٹو زرداری پارٹی کو مضبوط بنانے کے لئے میری اور بلاول بھٹو کی مدد کر رہے ہیں۔ اس موقع پر راولپنڈی کی سیاسی اور سماجی شخصیت راجہ فیاض یعقوب نے بھی پیپلزپارٹی میں شمولیت کا اعلان کیا۔