لاہور(سپورٹس رپورٹر)پاکستان سپر لیگ کے آٹھویں میچ میں ملتان سلطانز کے چھکوں کی بارش کے جواب میں اسلام آباد یونائیٹڈ کے کپتان شاداب خان نے بھی چھکے برسادیے، لیکن سلطانز کے بائولرز نے ٹیم کو 20 رنز سے فتح دلوادی۔ کراچی میں کھیلے گئے میچ میں ملتان سلطانز نے ٹم ڈیوڈ اور رائلی روسو کی جارحانہ بیٹنگ کی بدولت اسلام آباد یونائیٹڈ کو جیت کیلئے 218 رنز کا ہدف دیا تھا ‘جواب میں یونائیٹڈ کی ٹیم 197 رنز پر آل آؤٹ ہوگئی۔شاداب خان 91 رنز کی شاندار اننگز کھیلی ‘ 5 چوکے اور 9 چھکے لگائے۔ ایلیکس ہیلز 23 رنز بنا کربیٹر رہے۔  خوش دل شاہ نے 4 جبکہ ڈیوڈ ویلی نے 3 وکٹیں لیں ۔ ملتان سلطانز نے217 رنز بنائے۔ ٹم ڈیوڈ نے 29 گیندوں پر 6 چوکوں اور اتنے ہی چھکوں کی مدد سے 71 رنز کی دھواں دار اننگز کھیلی جبکہ رائلی روسو نے 35 گیندوں 67 رنز کی اننگز کھیلی۔ حسن علی، محمد وسیم اور مرچنٹ ڈی لینگ نے ایک ایک کھلاڑی کو آؤٹ کیا۔ٹم ڈیوڈ کو میچ کا بہترین کھلاڑی قرار دیا گیا ۔ ملتان سلطانز نے مسلسل چوتھی فتح اپنے نام کی ۔