موقع ملا تو ضرور پاکستان کا وزیر خارجہ بنوں گا: شاہنواز دھانی 

لاہور(سپورٹس رپورٹر)قومی ٹیم کے فاسٹ بائولر اور پی ایس ایل میں ملتان سلطانز کی نمائندگی کرنے والے شاہنواز دھانی نے مستقبل میں پاکستان کا وزیرخارجہ بننے کی خواہش کا اظہار کیا ہے۔شاہنواز دھانی کی ایک ویڈیو پی ایس ایل کے ٹوئٹر اکاؤنٹ پر شیئر کی گئی، جس میں وزیرخارجہ، دلوں کا فاتح جیسے القابات لکھے گئے اور ساتھ ہی سوال کیا گیا کہ شاہنواز دھانی اور مزید کتنے خطاب لے سکیں گے۔ شاہنواز دھانی نے ویڈیو پیغام میں کہا کہ ورلڈ کپ میں سب کہتے تھے کہ شاہنواز دھانی ہماری ٹیم کا وزیر خارجہ ہے، میں ورلڈکپ میں غیر ملکی کرکٹرز سے ملا، ایم ایس دھونی اور راشد خان سے بھی ملا۔ جو ٹیم بھی ہارتی تھی وہ ان کے کھلاڑیوں سے جا کر ضرور ملتے تھے۔ اگر موقع ملا تو وہ ضرور پاکستان کے وزیر خارجہ بنیں گے۔ پی ایس ایل ہو یا پاکستان کی نمائندگی میں اسی مسکراہٹ کیساتھ کرکٹ کھیلتا ہوں اور ہمیشہ اسی مسکراہٹ کیساتھ کرکٹ کھیلتا رہوں گا کیونکہ لوگ مجھے ایسے ہی پسند کرتے ہیں۔ شائقین اب پی ایس ایل میں جشن منانے کا نیا انداز دیکھیں گے اور اسے پسند بھی کریں گے۔