بیجنگ+ اسلام آباد  (شنہوا+ خبر نگار خصوصی) چین کے صدر شی جن پنگ نے اپنے پاکستانی ہم منصب عارف علوی اور وزیر اعظم شہباز شریف کو  پشاور میں ہونے والے دہشت گردی کے ہولناک حملے پر تعزیت کے پیغامات بھیجے ہیں۔ بدھ کو اپنے پیغام میں صدر شی نے کہا کہ پشاور میں ہونے والے دہشت گردی کے تباہ کن حملے کے بارے میں جاننے کے بعد وہ چینی حکومت اور عوام کی جانب سے ہلاکتوں پر گہرے دکھ کا اظہار اور زخمیوں اور سوگوار خاندانوں سے دلی ہمدردی کا اظہار کرتے ہیں۔ شی نے زور دے کر کہا کہ چین ہر قسم کی دہشت گردی کی مخالفت کرتا ہے اور اس واقعے کی شدید مذمت کرتا ہے۔ انہوں نے کہا کہ چین انسداد دہشت گردی کے قومی ایکشن پلان کو آگے بڑھانے، سماجی استحکام اور لوگوں کے تحفظ کے لیے پاکستان کی کوششوں کی بھرپور حمایت جاری رکھے گا۔ صدر شی نے کہا کہ چین پاکستان کے ساتھ انسداد دہشت گردی کے تعاون کو آگے بڑھانے کے لیے تیار ہے اور خطے کے ساتھ ساتھ پوری دنیا میں امن و سلامتی کو برقرار رکھنے کے لیے مل کر کام کرے گا۔ چینی وزیر اعظم لی کی چیانگ نے بھی بدھ کو  پاکستانی ہم منصب شہباز شریف کو تعزیت کا پیغام بھیجا ہے۔ اظہار یکجہتی پر  شہباز شریف نے چینی صدر اور وزیر اعظم کا شکریہ ادا کیا ہے۔