اسلام آباد( نمائندہ نوائے وقت)  بانی پی ٹی آئی نے کمرہ عدالت میں صحافیوں سے گفتگو کرتے ہوئے کہا  مجھے ابھی پتہ چلا بشری بی بی رات بنی گالہ منتقل ہوئی میں نے رات کو ان کو کمبل بھیجا تھا۔ ہم نے گھر جانے کیلئے نہ کسی کو درخواست دی نہ رعایت مانگی۔ فیصلے اوپر سے لکھوائے جارہے ہیں۔ جس ہار کو بنیاد بناکر سزا دی گئی وہ پریس کانفرنس میں عوام کو دکھائیں گے ۔  بشری بی بی نے اڈیالہ جیل میں پہلی دفعہ میڈیا سے گفتگو کرتے ہوئے کہا کہ نہ درخواست دی نہ ڈیل کی، نہ اڈیالہ جیل سے منتقلی کے وقت بتایا گیا کہ بنی گالہ منتقل کرنا ہے۔ میں جانے کے لئے تیار نہیں تھی، مجھے ریسٹ ہائوس کا کہہ کر لے جایا گیا۔ میں نے خود جیل میں آکر سرنڈر کیا، میں ڈرپوک نہیں ہوں۔ ہم بہادر ہیں، ایمان مضبوط ہے۔ جہاں مرضی رکھیں مجھے کوئی فرق نہیں پڑتا۔ بشری بی بی نے کہا کہ میں نے جب خود آکر گرفتاری دے دی تو شرمندگی سے بچنے کے لئے وہاں بھیج دیا گیا۔ بنی گالہ کو سب جیل بنایا گیا، وہ کوئی ہوٹل نہیں ہے۔ ابھی بھی کہتی ہوں اگر کوئی سمجھتا ہے ڈیل ہے تو توڑ دیں، بے شک جہاں مرضی رکھیں میں تیار ہوں۔