وزیر اعلی پنجاب کی معاون خصوصی فردوس عاشق اعوان نے کہا ہے کہ قومی سلامتی کے اداروں کو للکارنے والے مولانا فضل الرحمن سوائے مودی کی خدمت کے کچھ نہیں کررہے، آصف زرداری نے سیاسی بیروزگار ٹولے کا ریموٹ کنٹرول اپنے ہاتھ میں لے لیا۔
سماجی رابطے کی ویب سائٹ ٹوئٹر پر اپنے بیان میں فردوس عاشق اعوان نے کہا کہ اسمبلی کو جعلی کہہ کر ضمنی الیکشن میں حصہ لینے کا اعلان کرنے والے اپنا بیانیہ اپنے ہاتھوں دفن کرچکے۔ قومی سلامتی کے اداروں کو للکارنے والے مولانا فضل الرحمان سوائے مودی کی خدمت کے کچھ نہیں کررہے، ملک میں انتشار اور خانہ جنگی کے راستے پر نکلے اس ٹولے کے ناپاک عزائم عوام کبھی پورے نہ ہونے دیں گے۔ فردوس عاشق اعوان نے مزید کہا کہ تاریخ پر تاریخ دینے کی روایت پر عمل پیرا نام نہاد پی ڈی ایم قیادت ایک بار پھر استعفوں کی ردی ایک دوسرے کو دکھا کر دل پشوری کرتی رہی۔ آصف علی زرداری کا جادو خوب چلا، کرپشن کے بےتاج بادشاہ نے کمال مہارت سے پی ڈی ایم کو ہائی جیک کرتے ہوئے سیاسی بے روزگار ٹولے کا ریموٹ کنٹرول پوری طرح اپنے ہاتھ میں لے لیا۔
