چوتھے ٹیسٹ میں جگہ ملی تو اچھی کارکردگی دکھائونگا: عثمان خواجہ 

لاہور(سپورٹس ڈیسک )آسٹریلوی بیٹر عثمان خواجہ نے کہا ہے کہ ٹریوس ہیڈ کی جگہ ایشز سیریز کے چوتھے ٹیسٹ میچ میں کارکردگی دکھانے کیلئے تیار ہوں ۔ امکان ہے کہ وہ دو سال کے وقفہ کے بعد پہلا ٹیسٹ میچ کھیلیں گے ۔ عثمان خواجہ نے کہا کہ کارکردگی دکھانے کیلئے ایک میچ ہی کافی ہوتا ہے ۔ اگر موقع دیا گیا تو اچھی کارکردگی کا مظاہرہ کروں گا۔ صورتحال کو سمجھتا ہوں ‘ہوسکتا ہے سنچری کر جائوں ‘ہیڈ کی غیر موجودگی میں اچھی کارکردگی کا مظاہر ہ کروں ۔ اگر ایسانہیں ہوتا تو ابھی بڑی کرکٹ باقی ہے ۔ آسٹریلیا نے مارچ اور اپریل میں دورہ پاکستان کرنا ہے ‘عثمان خواجہ کو امید ہے کہ وہ سکواڈ کا حصہ ہونگے ۔ مجھے ٹیم میں واپسی کیلئے صرف ایک میچ کی ضرورت ہے ۔ اگر ایسا نہ بھی ہوسکا تو سیریز باقی ہے ۔ برصغیر کی کنڈیشنز کیلئے میں بہت سوٹ کرتا ہوں ۔ سخت محنت کر رہا ہوں‘آسٹریلیا کیلئے جوکچھ کر سکتا ہوں کر رہا ہوں ۔ پینتیس سال عمر ہونے کے باوجود کو خود کو نوجوان محسوس کرتا ہوں ۔ جسم ساتھ دے رہا ہے ‘کرکٹ جاری رکھوں گا۔ کرکٹ آسٹریلیا نے اعلان کیا ہے کہ گزشتہ روز ہونے والے تمام کھلاڑیوں اور سٹاف کے کرونا ٹیسٹ منفی آئے ہیں ۔