قصور‘ جڑانوالہ‘ اوکاڑہ‘ بچیانہ (نمائندہ نوائے وقت + نامہ نگار + نوائے وقت رپورٹ) ٹریفک حادثات میں 9 افراد جاں بحق ہو گئے۔ کوٹ رادھاکشن رائیونڈ روڈ پر ٹریکٹر اور کار میں تصادم کے نتیجے میں کار میں سوار ایک خاتون سمیت دو افراد جاں بحق ہو گئے۔ رائیونڈ کوٹ رادھاکشن روڈ پر ایک فیملی کار میں سوار ہو کر جا رہی تھی کہ سامنے سے آنے والی ٹریکٹر ٹرالی نے کار کو ٹکر دے ماری جس کے نتیجے میں کار میں سوار ایک عورت سمیت دو افراد جاں بحق ہو گئے۔ جڑانوالہ بچیانہ روڈ پر کار درخت سے ٹکرا جانے سے 2افراد جاں بحق اور  3زخمی ہو گئے۔ جاں بحق ہونے والے عمیر اور ساجد دیگر افراد کے ہمراہ شادی پر جا رہے تھے۔ نعشوں اور زخمیوں کو ٹی ایچ کیو ہسپتال جڑانوالہ منتقل کر دیا گیا۔ جڑانوالہ 624گ ب ہری پور سرفراز کے گھر شادی تقریب میں گزشتہ رات رانا عمیر، رانا ساجد اپنے 3کزنوں کے ساتھ کار میں سوار ہو کر جا رہے تھے کہ تیز رفتار ی کے باعث کار روڈ کے سائیڈ پر لگے درخت کے ساتھ ٹکرا گئی۔ جس کے نتیجہ میں رانا عمیر اور رانا ساجد موقع پر جاں بحق ہوگئے جبکہ پیچھے بیٹھے 3کزن لاریب وغیرہ بری طرح زخمی ہوگئے۔ فیصل آباد روڈ پر آئل ٹینکر نے جاتے ہوئے موٹر سائیکل کو ٹکر مار دی۔ حادثہ میں بھکیانہ کے رہائشی موٹر سائیکل پر سوار 45 سالہ خاتون انور بی بی اور 18 سالہ نوجوان سلمان موقع پر دم توڑ گئے جبکہ ایک خاتون شدید زخمی ہو گئی۔ اطلاع ملنے پر ریسکیو 1122 ایمبولینس فوری جائے حادثہ پر پہنچ گئیں۔ ڈی جی خان میں کوٹ چٹھہ انڈس ہائی وے ڈی جی خان پر کار اور موٹر سائیکل میں ٹکر ہو گئی جس سے 3 افراد جاں بحق ہو گئے۔