متحدہ عرب امارات ،پہاڑی  علاقے کی سیر کے دوران باپ بیٹا  گڑھے میں ڈوب کرجاں بحق

دبئی(اے پی پی)متحدہ عرب امارات میں پہاڑی علاقے کی سیر کے دوران باپ بیٹا  برساتی  پانی کے گڑھے میں ڈوب کر ہلاک ہو گئے۔     الامارات الیوم  نے  اماراتی شہری سلطان مرزوق الشحی کے بھائی سلیمان الشحی  کی میڈیا سے گفتگو کے حوالے سے بتایا کہ حادثے سے قبل بھائی سے ٹیلیفون پر بات ہوئی تھی جس میں  اس نے بتایا تھا کہ وہ اپنی فیملی کو وادی میں سیر کے لیے لے کر جا رہا ہے۔کھانے کے بعد 13 سالہ بیٹا ہاتھ دھونے کے لیے گیا جہاں وہ بارش کے پانی سے بھرے گڑھے میں گر گیا۔
 جس پر  بچے  کی ماں نے  چیخنا چلانا شروع کر دیا،  سلطان مرزوق   اپنے بیٹے کو بچانے کے لیے گیا تاہم وہ بھی گڑھے میں گر گیا،  دونوں میں سے کسی کو بھی اندازہ نہیں تھا کہ صحرا اور پہاڑی علاقے میں اتنا گڑھا گہرا ہوگا، گڑھے کے اطراف کوئی حفاظتی جال بھی نہیں تھا۔ بعد ازاں امدادی ٹیموں نے موقع پر پہنچ کر باپ اور بیٹے کی لاشیں گہرے گڑھے سے نکال لیں۔