لاہور پولیس نے نیو ایئر نائٹ پرسکیورٹی کے فول پروف انتظامات کئے:سی سی پی او

لاہور(نامہ نگار)کیپیٹل سٹی پولیس آفیسر لاہوربلال صدیق کمیانہ نے بہترین سکیورٹی و ٹریفک انتظامات پر لاہور پولیس کے متعلقہ افسران اور اہلکاروں کو شاباش دیتے ہوئے کہا ہے کہ لاہور پولیس کی طرف سے نیو ایئر نائٹ کے موقع پرسکیورٹی کے فول پروف انتظامات کئے گئے۔ پارکوں، تفریح گاہوں اور پبلک مقامات پر آنے والے شہریوں اور فیملیز کو بھرپور سیکورٹی فراہم کی گئی۔ لاہور پولیس کی جامع منصوبہ بندی کی وجہ سے صوبائی دارالحکومت میں نیو ایئر نائٹ پر امن گذری۔ لاہور پولیس کے تمام یونٹس نے بہترین کوآرڈنیشن اور شاندارٹیم ورک کا مظاہرہ کیا۔ لاہور پولیس شہریوں کی جان و مال کی حفاظت کیلئے مسلسل سرگرم عمل ہے۔ نیو ایئر نائٹ کی سرگرمیوں کے دوران ناجائز اسلحے کیخلاف کریک ڈاؤن کے 41مقدمات درج،49ملزمان گرفتار کئے گئے۔ ون ولنگ کیخلاف کارروائی عمل میں لاتے ہوئے 37 مقدمات کا اندراج، 42 ون ویلرز گرفتار کئے گئے۔ آتش بازی کرنیوالوں کیخلاف کارروائی عمل میں لاتے ہوئے9مقدمات کا اندراج، 12 ملزمان گرفتار کئے گئے۔ جبکہ منشیات کے خلاف کارروائی عمل میں لاتے ہوئے 49مقدمات کا اندراج،58ملزمان گرفتار، 28کلو سے زائد چرس اور768لیٹر شراب برآمد کی گئی۔ عوام کی جان و مال کا تحفظ لاہور پولیس کا اولین نصب العین ہے۔