بلاول بھٹو پیپلزپارٹی کی جنم بھومی واپس لینے لاہورآرہے :فیصل میر

لاہور(نامہ نگار)پاکستان پیپلز پارٹی کے سینئر رہنما اور پی پی 161سے امیدوار فیصل میر نے حلقے میں کارنر میٹنگ سے خطاب کرتے کہا ہے کہ بریف کیس جج کی اولاد ہمیں دھمکانے سے باز رہے،کسی کے کندھوں پر سوار ہو کر آنے والے اپنی اوقات دکھا رہے ہیں۔پیسے بانٹنے والے خاندان کے سپوت کو بلاول بھٹو کے متعلق بات کرنے کی جرات کیسے ہوئی؟۔عطا تارڑ اپنی زبان ٹھیک کریں،سیاست میں بھونڈے پن کی کوئی گنجائش نہیں۔ابھی تو پارٹی شروع ہوئی ہے اور اپ کی چیخیں آسمانوں تک پہنچ رہی ہیں۔فیصل میر کا کہنا تھا کہ لاہور کسی کے باپ کی جاگیر نہیں، پیپلز پارٹی کی بنیاد لاہور میں رکھی گئی  ، بلاول اپنی پارٹی کی جنم بھومی واپس لینے آرہے ہیں۔جو کرنا ہے کر کے دیکھ لیں لاہور واپس لے کر چھوڑیں گے۔بلاول بھٹو میں ہمت و حوصلہ بھٹو اور اپنی والدہ بی بی شہید سے آیا۔