لاہور+ اسلام آباد (نامہ نگار+ نمائندہ خصوصی) پاکستان  پیپلز پارٹی کے چیئرمین بلاول بھٹو آج منگل کو تین روزہ دورے پر لاہور پہنچ رہے ہیں جبکہ بلاول بھٹو زرداری نے نے تین جنوری بدھ تین بجے سہ پہر بلاول ہاؤس لاہور میں پیپلز پارٹی کی سینٹرل ایگزیکٹو کمیٹی کا اجلاس طلب کرلیا ہے۔ پاکستان پیپلزپارٹی کی سی ای سی کے اجلاس میں ملکی سیاسی صورت حال اور عام انتخابات کے حوالے سے اہم فیصلے ہوں گے جبکہ عام انتخابات کے حوالے سے پیپلز پارٹی کی مہم اور منشور پر سینٹرل ایگزیکٹو کمیٹی کے اجلاس میں بات کی جائے گی۔ علاوہ ازیں پیپلز پارٹی لاہور نے بلاول بھٹو زرداری کے استقبال کی بھر پور تیاری کی ہے۔ بلاول بھٹو زرداری 3جنوری کو شریفوں کے گڑھ جاتی امراء میں ان کے دیرینہ ساتھی اور سابق صوبائی وزیر جیلخانہ جات چودھری عبدالغفور میو کے فارم ہاؤس پر دن ایک بجے جلسہ عام سے خطاب کریں گے۔ اس موقع پر پی پی 166سے پیپلز پارٹی کے امیدوار اور پی پی لاہور کے جنرل سیکرٹری رانا جمیل منج کی ذاتی کاوشوں سے چودھری عبدالغفور میو پاکستان پیپلز پارٹی میں شمولیت کا اعلان کریں گے۔بلاول کے جلسے کو کامیاب بنانے کیلئے این اے125 میں تیاریاں تیزی سے جاری ہیں۔