اسلام آباد (خصوصی نامہ نگار) پاک فضائیہ کے سربراہ ایئر چیف مارشل ظہیر احمد بابر سدھو نے ترکی کے شہر قونیا میں تیسرے مین جیٹ بیس کا دورہ کیا۔ جہاں انہوں نے کثیر الملکی فضائی مشق اناطولین ایگل-2021 کا معائنہ کیا۔ پاک فضائیہ کے ترجمان کے مطابق ایئر چیف کو  تفصیلی بریفنگ دی گئی۔ شرکا کے ساتھ بات چیت کرتے ہوئے ایئر چیف نے  ایئرکریو کی آپریشنل تیاریوں اور پیشہ ورانہ مہارت کو سراہا۔ انہوں نے حقیقی جنگی تناظر میں اثاثوں کی ہم آہنگی اور ان کے فضائی آپریشنز کے دوران مئوثر استعمال کے لئے تربیت کی اہمیت پر بھی زور دیا۔ انہوں نے مزید کہا کہ اس طرز کی مشقیں دوست ممالک کی افواج کے مابین ہم آہنگی اور تعاون کے حصول میں بے حد  مئوثر ثابت ہوتی ہیں۔ اس مشق میں ترکی، آذربائیجان، پاکستان اور قطر کی فضائی افواج شرکت کر رہی ہیں۔ پاک فضائیہ کا دستہ جے ایف۔17 تھنڈر طیاروں پر مشتمل ہے جس میں پی اے ایف کی مختلف یونٹوں اور سکواڈرنز کا تربیت یافتہ عملہ شریک ہے۔