حافظ آباد(نمائندہ نوائے وقت+نمائندہ خصوصی +نامہ نگار) کفر اور طاغوتی طاقتوںکی اسلام کے خلاف بڑھتی ہوئی سازشوں کے قلع قمع کے لئے علماء ومشائخ کو حجروں سے نکل کر حسینی ؓکردار اداکرناچاہئے۔ان خیالات کا اظہار اہلسنت کے مرکزی راہنما علامہ سید فداحسین شاہ ، تحریک لبیک کے صاحبزادہ سید عطاء الحسنین ، جماعت الصفہ پاکستان کے سربراہ بیرسٹر پیر سید وسیم الحسن نقوی،علامہ فیصل ندیم کیلانی، علامہ حبیب اﷲجلالی، مولانا محمد اشرف سیال، مولانا رانا محمد عثمان اصغرچشتی، سابق کونسلر محمد امین انصاری، سعید انجم ایڈوکیٹ نے محلہ خانپورہ میں ممتاز عالم دین علامہ رانا محمد اصغر چشتی ؒ کے سالانہ عرس پاک کی تقریب سے خطاب کرتے ہوئے کیا۔ انہوںنے کہا کہ علامہ رانا محمد اصغر چشتی اپنی ذات میں انجمن تھے۔انہوںنے دین اسلام کے لئے جس جراء ت وبہادری سے خدمات سرانجام دیں ۔وہ علماء ومشائخ کے لئے قابل ستائش ہیں۔ آج ضرورت اس امر کی ہے کہ ہم اپنی نوجوان نسل کو غیر اسلامی طاقتوں کی یلغار سے بچانے کے لئے میدان عمل میں نکل کر جہاد کریں۔