لاہور(سپورٹس رپورٹر)پاکستان کرکٹ بورڈ نے سیزن 23-2022 ء کیلئے ویمنز سنٹرل کنٹریکٹ کا اعلان کردیا ہے۔ کنٹریکٹ میں مجموعی طور پر 20 خواتین کرکٹرزکو شامل کیا گیا ہے۔کنٹریکٹ میں 8 کھلاڑیوں کو ترقی جبکہ طوبیٰ حسن، گل فیروزہ اور صدف شمس کو پہلی مرتبہ حصہ بنایا گیا ہے۔سیزن 22-2021 ء میں عمدہ کارکردگی کی بدولت سدرہ امین، غلام فاطمہ اور ارم جاوید کو دوبارہ سنٹرل کنٹریکٹ میں شامل کرلیا گیا ہے۔سنٹرل کنٹریکٹ میں ترقی پانے والی کھلاڑیوں میں ندا ڈار اور عالیہ ریاض کو کپتان بسمہ معروف کو اے کٹیگری کا حصہ بنایا گیا ہے۔ انعم امین، فاطمہ ثناء ، نشرح سندھو اور عمائمہ سہیل کو بی کٹیگری میں شامل کر لیا گیا ہے۔ منیبہ علی اور عائشہ نسیم کو کٹیگری سی کا حصہ بنایا گیا ہے۔سیزن 22-2021 میں قابل ذکر کارکردگی کا مظاہرہ نہ کرنے پر جویریہ خان کو سی کٹیگری میں شامل کیا گیا ہے۔چیئرآف ویمنز سلیکشن کمیٹی اسماویہ اقبال کا کہنا ہے کہ 8 کھلاڑیوں کا ترقی اور 3 کا پہلی مرتبہ سنٹرل کنٹریکٹ پانا درحقیقت پاکستان خواتین کرکٹ کے درست سمت میں آگے بڑھنے کی نشاندہی کرتا ہے تاہم انہیں اب بھی بہت محنت کی ضرورت ہے۔ سیزن 23-2022 ء میں جتنی زیادہ کرکٹ کھیلنے کو مل رہی ہے، وہ پرامید ہیں کہ اس سیزن کے اختتام پر پاکستان ویمنز کرکٹ ٹیم ایک مزید بہتر سائیڈ بن کر سامنے آئے گی۔سنٹرل کنٹریکٹ نہ صرف کھلاڑیوں کی گزشتہ سیزن میں عمدہ کارکردگی کا صلہ ہوتا ہے بلکہ یہ انہیں آئندہ سیزن میں بھی مزید بہتر کھیل پیش کرنے کی ترغیب دیتا ہے۔ وہ گزشتہ سیزن میں بھرپور عزم اور لگن کا مظاہرہ کرنے پر تمام کھلاڑیوں کی مشکور ہیں، وہ امید کرتی ہیں کہ یہ تمام کرکٹرز آئندہ سیزن کے دوران کامن ویلتھ گیمز، آئی سی سی ویمنز چیمپئن شپ اور آئی سی سی ویمنز ٹی ٹونٹی ورلڈ کپ میں بھی بہترین کارکردگی کامظاہرہ کریں گی۔ویمنزسنٹرل کنٹریکٹ برائے 23-2022ئ:کیٹگری اے : بسمہ معروف، ندا ڈار اور عالیہ ریاض‘کیٹگری بی: انعم امین، ڈیانا بیگ، فاطمہ ثنائ، نشرح سندھو اور عمائمہ سہیل‘کیٹگری سی: عائشہ نسیم، منیبہ علی، جویریہ خان، سدرہ امین اور سدرہ نواز‘کیٹگری ڈی: غلام فاطمہ، گل فیروزہ، ارم جاوید، کائنات امتیاز، سعدیہ اقبال، صدف شمس اور طوبیٰ حسن۔