پاکستان ویمن فٹبال ٹیم اگلے ماہ سنگاپور کیخلاف فرینڈلی میچز کھیلے گی

لاہور(سپورٹس رپورٹر)پاکستان ویمن فٹبال ٹیم اگلے ماہ سنگاپور کے خلاف فرینڈلی میچز کھیلے گی۔ذرائع کے مطابق آئندہ ماہ کی فیفا ویمن انٹرنیشنل ونڈو میں میچز کیلئے پاکستان فٹبال فیڈریشن کے فٹبال ایسوسی ایشن آف سنگاپور سے معاملات طے پاگئے ۔ پاکستان اور سنگاپور کی ویمن ٹیمیں 13 سے 19 جولائی کے درمیان 2 میچز کھیلیں گی۔پاکستان فٹبال فیڈریشن کی نارملائزیشن کمیٹی عید تعطیلات کے بعد میچز کا باضابطہ اعلان کردیگی۔پی ایف ایف نے سنگاپور سے قبل کرغزستان اور ماریشیس سے بھی بات کی تھی تاہم ان سے معاملات طے نہیں ہوئے تھے۔میچز کی تیاری کیلئے پاکستان ویمن فٹبال ٹیم کا کیمپ کراچی میں جاری ہے۔ برطانیہ میں فٹبال کھیلنے والی اقصی مشتاق کی بھی پاکستان ٹیم میں شمولیت کا امکان ہے۔