قائم مقام سی سی پی اولاہوراورایس ایس پی آپریشنزلاہور چودھری شفیق گجر نے بتایا کہ کل رات جناح ہسپتال کی ایمرجنسی میں حملہ کرنے والے پانچ میں سے دو دہشتگردوں کو مریدکے کے نواحی قصبے ریحان پورہ سے گرفتار کیا گیا ہے۔ ایس ایس پی آپریشنز کےمطابق کارروائی کے بعد ملزمان جناح ہسپتال سے براستہ موٹر وے کالا شاہ کاکو اور وہاں سے ریحان پورہ پہنچ کر روپوش ہو گئے۔ ذرائع کا کہنا ہے کہ حساس ادارے نے ملزمان کی کال ریکارڈنگ کے بعد انہیں سم کی مدد سے ٹریس کیا۔ دہشتگردوں کے خلاف تھانہ فیروز والا میں مقدمہ درج کرکے لاہور پولیس کے حوالے کر دیا گیا ہے جہاں سے انہیں تفتیش کے لئے نامعلوم مقام پرمنتقل کیا گیا ہے۔ پولیس کے مطابق ایک ملزم نے مجاہد فورس کی وردی پہن رکھی تھی اورایک کی ٹانگ گولی لگنے سے زخمی ہے۔ یاد رہے کہ ریحان پورہ وہ قصبہ ہے جہاں کچھ ماہ قبل ایک کسان کی اطلاع پر پولیس نے کھمبے پرنصب بم ناکارہ کر کے گرڈ اسٹیشن کو تباہی سے بچایا تھا۔