سعودی خلاباز خلائی سٹیشن میں مشن  مکمل کر کے زمین پر واپس پہنچ گئے

جدہ (اے پی پی)سعودی خلاباز خلائی سٹیشن میں مشن مکمل کر نے کے بعد زمین پر واپس پہنچ گئے۔ عرب نیوز کے مطابق دوسرا آل پرائیویٹ مشن جس میں2سعودی خلاباز بھی شامل ہیں ،خلائی سٹیشن پر8روزہ سائنسی ریسرچ کے بعد گزشتہ روز امریکی ریاست فلوریڈا کے ساحل کے قریب اترے۔ سپیس ایکس کریو ڈریگن کیپسول جو انہیں لے کر آیا نے 12 گھنٹے کی واپسی کی پرواز کی اور خلا سے زمین کی فضا میں داخلے کے بعد خیلج میکسیکو میں پیراشوٹ کے ذریعے اتارا۔واپسی کی اس پرواز کو سپیس ایکس اور مشن کے پیچھے موجود کمپنی ایکژیوم سپیس کی طرف سے مشترکہ ویب کاسٹ کے ذریعے براہ راست نشر کیا گیا۔مشن میں شامل سعودی خلابازوں علی القرنی اور ریانہ برناوی نے خلائی مشن کے دوران سعودی سکول کے بچوں کے ساتھ تجربات میں حصہ لیا۔ خلانوردوں کا سپیش شپ ایکس ڈریگن 300 پانڈ سے زائد سامان کے ساتھ زمین پر واپس پہنچا جس میں ناسا کے سائنسی آلات کے علاوہ 20 سے زیادہ مختلف تجربات کا ڈیٹا شامل ہے۔ واضح رہے کہ 1985 میں سعودی فضائیہ کے پائلٹ شہزادہ سلطان بن سلمان بن عبدالعزیز نے امریکا کے زیر اہتمام خلائی سفر میں حصہ لیا تھا جو خلا میں جانے والے پہلے سعودی تھے۔
سعودی خلا باز