ٹی ٹونٹی ورلڈ کپ میلہ شروع، افتتاحی تقریب، فنکاروں کے جلوے

لاہور(سپورٹس رپورٹر)آئی سی سی ٹی20 ورلڈکپ کی افتتاحی تقریب گزشتہ رات نیویارک میں ہوئی جس میں فنکاروں نے جلوے بکھیرے اور ٹیموں کو خوش آمدید کہا ۔ میگا ایونٹ کا پہلا میچ آج امریکہ اور کینیڈا کی ٹیموں کے درمیان ڈیلاس میں کھیلا جائیگا۔میچ پاکستانی وقت کے مطابق صبح ساڑھے پانچ بجے شروع ہوگا۔دوسرے میچ میں ویسٹ انڈیز اور پاپوا نیو گنی کی ٹیمیں صبح ساڑھے سات بجے گیانا میں مد مقابل ہونگی ۔  پاکستانی ٹیم انگلینڈ سے ٹی20 سیریز ہارنے کے بعد لندن سے امریکی شہر ڈیلاس پہنچ چکی ہے، جہاں وہ اپنا افتتاحی میچ میزبان امریکہ کیخلاف 6 جون کو ڈیلاس میں کھیلے گی۔میچ پاکستانی وقت کے مطابق صبح ساڑھے آٹھ بجے شروع ہو گا۔ پاکستان کا دوسرا میچ بھارت کیخلاف  9 جون کو نیویارک میں ہوگا۔ ٹی20 ورلڈ کپ کا نواں ایڈیشن امریکہ اور ویسٹ انڈیز کی مشترکہ میزبانی میں 29 جون تک جاری رہیگا جس میں پہلی بار 20 ٹیمیں شرکت کررہی ہیں۔ پہلے مرحلے کیلئے 20 ٹیموں کو 5،5 کے 4 گروپس میں تقسیم کیا گیا ہے۔ہر ٹیم ابتدائی گروپ مرحلے میں 4،4 میچز کھیلے گی، ہر گروپ سے سرفہرست دو ٹیمیں سپرایٹ میں پہنچ جائیں گی۔ 8 ٹیموں کو سپرایٹ مرحلے میں مزید دو گروپوں میں تقسیم کیا گیا ہے، جہاں تمام ٹیموں کو سیمی فائنل تک رسائی کیلئے 3،3 میچز کھیلنا ہوں گے اور ہر گروپ کی دو سرفہرست ٹیموں کے درمیان سیمی فائنل کھیلا جائیگا، جس کے بعد 2 ٹیمیں 29 جون کو بارباڈوس میں ٹرافی کی آخری جنگ لڑیں گی۔