ٹی ٹونٹی ورلڈ کپ کے ٹکٹس بلیک میں فروخت ہونگے : نسیم اشرف 

 لاہور(سپورٹس رپورٹر)ٹی ٹونٹی ورلڈ کپ میں پاک بھارت میچ کے ٹکٹس نایاب ہو گئے، سابق چیئرمین پی سی بی ڈاکٹر نسیم اشرف بھی بھرپور کوشش کے باوجود اسے حاصل نہیں کر سکے۔انہوں نے آئی سی سی کے بیلٹنگ سسٹم پر سوال اٹھاتے ہوئے کہا کہ میں نے کسی سے نہیں سنا کہ اسے ٹکٹس ملے ہوں، مخصوص افراد نے تمام ٹکٹس پر قبضہ کر لیا جو اب مبینہ طور پر بلیک میں فروخت کی جا رہی ہیں۔ میں نے پی سی بی کو بھی اس حوالے سے حقائق سے آگاہ کرتے ہوئے مدد کا کہا لیکن بدقسمتی سے میری ای میل تک کا کسی نے جواب دینا مناسب نہ سمجھا۔ بعض ویب سائٹس پر ہزاروں ڈالرز میں ٹکٹس فروخت کی جا رہی ہیں، یہ رقم پاکستانی کرنسی میں لاکھوں بنتی ہے۔ اگر آئی سی سی امریکہ میں کرکٹ کو فروغ دینا چاہتی ہے تو اسے ٹکٹنگ سسٹم بہتر اور ساتھ ریٹس بھی مناسب رکھنے ہوں گے۔