فرحان محبوب نے پی ایس ایف انٹرنیشنل سکواش سرکٹ ون ٹورنامنٹ جیت لیا 

لاہور(سپورٹس رپورٹر) فرحان محبوب نے پی ایس ایف انٹرنیشنل سکواش سرکٹ ون ٹورنامنٹ جیت لیا جبکہ حمزہ خان نے دوسری پوزیشن حاصل کی۔ ٹورنامنٹ کی اختتامی تقریب کے مہمان خصوصی ایئر مارشل عامر مسعود تھے جنہوں نے کامیابی حاصل کرنے والے کھلاڑیوں میں انعامات تقسیم کئے۔ پاکستان سکواش فیڈریشن کے سیکرٹری جنرل گروپ کیپٹن ارمغان عزیز کے علاوہ شائقین کی کثیر تعداد بھی موجود تھی۔پاکستان سکواش فیڈریشن کے زیراہتمام مصحف سکواش کمپلیکس میں ٹورنامنٹ کا فائنل میچ فرحان محبوب اور حمزہ خان کے درمیان کھیلا گیا جس میں فرحان محبوب نے حمزہ خان کو 3-2 سے شکست دے کر چیمپئن ہونے کا اعزاز حاصل کیا۔