حکمران وعدہ نبھانا بھی سیکھیں

مکرمی! جناب وزیراعلیٰ پنجاب محترم عثمان بزدار صاحب مورخہ 25 مئی 2021ء کو ظفر وال کے دورہ میں آپ نے شاہ پور بھنگو کے گرلز مڈل سکول کو ہائی کا درجہ دینے کا اعلان کیا تھا۔ شاہ پور بھنگو تحصیل شکر گڑھ کا آبادی کے لحاظ سے تیسرا بڑا گائوں ہے سب سے بڑا گائوں کنجروڑ آبادی 9330 نمبر 2 بارہ منگا آبادی 7429 نمبر 3 شاہ پور بھنگو آبادی 6811 ، 1998ء کی مردم شماری میں بھی یہ تیسرا بڑا گائوں تھا۔ ضیاء الحق کے دور سے لے کر آج تک کئی زندہ اور کئی مرحوم لیڈروں نے شاہ پور بھنگو کے گرلز سکول کو ہائی کا درجہ دینے کا وعدہ کیا لیکن کسی نے وعدے پرعمل نہ کیا۔ شاہ پور بھنگو سے چھوٹے بلکہ کئی 500 آبادی والے گائوں بھی تحصیل شکر گڑھ میں ہائی سکول ہیں۔ محترم اتنی بڑی آبادی والے گائوں کو ہائی کی بجائے ہائر سیکنڈری سکول کا درجہ دے کر اپریل 2022ء میں کلاسوں کا اجرا کرایا جائے تاکہ سابقہ ناانصافیوں کا ازالہ ہو سکے۔ (صوفی محمد اقبال ، شاہ پور بھنگو، شکر گڑھ)