لاہور(سپورٹس رپورٹر) پاکستان سپر لیگ کے 17 ویں میچ میں پشاور زلمی نے کراچی کنگز کو ہرا دیا۔پشاور زلمی کے 198 رنز کے ہدف کے تعاقب میں کراچی کی کنگز کی ٹیم مقررہ اوورز میں 8 وکٹوں کے نقصان پر 173 رنز بنا سکی اور اسے 24 رنز سے شکست کا سامنا کرناپڑا۔کراچی کنگز کے کپتان عماد وسیم نے ٹاس جیت کر پہلے فیلڈنگ کا فیصلہ کیا۔پشاور کے خلاف کراچی آغاز عمدہ رہا، عامر نے ایک اوور میں دو وکٹیں لے کر پشاور کو دھچکا پہنچایا۔راولپنڈی میں ہونے والے میچ میں محمد عامر نے اپنے پہلے اوور میں محمد حارث اور بابر اعظم کو صفر پر پویلین کی راہ دکھائی۔اس کے بعد محمد عامر نے اپنے دوسرے اوور میں بھی صائم ایوب کو آؤٹ کیا۔ ایک موقع پر پشاور زلمی کے محض 2 رنز پر تین کھلاڑی آؤٹ ہوچکے تھے۔تاہم بعد میں آنے والے کھلاڑیوں ٹام کوہلر، حسیب اللہ خان اور روومین پاول نے بالترتیب 56، 50 اور 64 رنز کی اننگز کھیل کر ٹیم کو پہنچنے والے ابتدائی نقصان سے باہر نکالا اور سکور بورڈ پر 198 رنز کا ہدف سجا دیا۔پشاور زلمی نے مقررہ اوورز میں 5 وکٹوں کے نقصان پر 197 رنز بنائے۔ محمد عامر نے 4 اور تبریز شمسی نے ایک وکٹ حاصل کی۔جواب میں کراچی کنگز 8وکٹوںپر 173ررنز بناسکی ۔میتھیو ویڈ 53اور کپتان عماد وسیم 57ناٹ آئوٹ رنز کیساتھ نمایاں رہے۔ چھ کھلاڑی ڈبل فگر میں بھی داخل نہ ہوسکے ۔ عظمت اللہ عمرزئی اور عامر جمال نے تین تین مجیب الرحمان نے دو کھلاڑیوں کوآئوٹ کیا ۔ روومین پاول کو میچ کا بہترین کھلاڑی قرار دیاگیا۔  لاہور قلندرز 5 میچز کھیل کرآٹھ پوائنٹس کیساتھ پہلے جبکہ ملتان سلطانز چھ میچز میں آٹھ پوائنٹس کیساتھ دوسرے ، اسلام آبادپانچ میچز میں چھ پوائنٹس کیساتھ تیسرے،پشاور زلمی چھ میچز میں چھ پوائنٹس کیساتھ چوتھے، کراچی کنگز سات میچز میں چار پوائنٹس کیساتھ پانچویں اور کوئٹہ گلیڈی ایٹرزپانچ میچز میں دو پوائنٹس کیساتھ چھٹے نمبر پر ہے۔