پاکستان سپر لیگ: راولپنڈی میں آج بارش، دونوں میچ متاثر ہونے کا امکان

لاہور(سپورٹس رپورٹر)پاکستان سپر لیگ 9میں آج ہفتہ کو مزید دو میچوں کا فیصلہ ہو گا‘دونوں میچ پنڈی کرکٹ سٹیڈیم راولپنڈی میں کھیلے جائیںگے۔ 17واں میچ دفاعی چیمپئن لاہور قلندرز اور پشاور زلمی کے مابین کھیلا جائیگا ، یہ میچ سہ پہر 2 بجے شروع ہو گا ۔ 18ویں میچ میں اسلام آباد یونائیٹڈ اور کوئٹہ گلیڈی ایٹرز کی ٹیمیں مدمقابل ہوں گی ،یہ میچ شام 7بجے شروع ہو گا ۔ دونوں میچز کیلئے ایک ہی ٹکٹ جاری کیا گیا ، ہفتے کو اگر دونوں میچز نہ ہوئے تو شائقین کو مکمل ٹکٹ ری فنڈ ہوگا اور اگر ایک بھی میچ ہوگیا تو ری فنڈ نہیں ملے گا۔راولپنڈی اور اسلام آباد میںآج ہفتہ کو بھی دن بھر بارش کی پیش گوئی ہے جبکہ بارش کی وجہ سے ٹیموں کا پریکٹس سیشن بھی نہیں ہوسکا۔ راولپنڈی میں شیڈول آج دونوں میچ بارش سے متاثر ہونے کا امکان ہے،محکمہ موسمیات کے مطابق آج راولپنڈی میں دن کے وقت بارش کے 100فیصد امکانات ہیں جبکہ رات کے اوقات میں 70فیصد بارش متوقع ہے۔حکام کا کہنا ہے کہ ہفتے کے روز گرج چمک کیساتھ بارش کا امکان ہے ،جمعہ کی صبح سے شروع ہو نے والا بارش کا سلسلہ ہفتے تک جاری رہے گا۔