لاہور (این این آئی)پاکستان ہاکی فیڈریشن کے چیف سلیکٹر سابق کپتان اصلاح الدین نے کہا ہے کہ قوم کو سبز باغ نہیں دکھائیں گے ٗ چار سال میں قومی ٹیم کو وکٹری اسٹینڈ پر پہنچا دیں گے، اولمپک گیمز میں ٹیم ابتدائی تین پوزیشن پر آجائیگی۔ ایشین گیمز کے جن 25 کھلاڑیوں کے نام پی ایچ ایف نے پاکستان اولمپکس ایسوسی ایشن کو دیئے ہیں اس میں سلیکشن کمیٹی اور ٹیم آفیشلز کی مشاورت شامل ہے۔ سابق ہاکی اولمپیئنز نے ملک کے مفاد میں ذمہ داری قبول کی ہے، ہم قوم کو سبز باغ نہیں دکھائیں گے، ایک مضبوط اور متوازن ٹیم کی تیاری میں چار سال کا عرصہ درکار ہوگا جس کے دوران ٹیم کامیابی بھی حاصل کرے اور اسے ناکامی کا بھی سامنا کرنا پڑے گا۔ ملک میں 20 سال بعد اوپن ٹرائلز کرائے گئے جس کے بعد ایشین گیمز کے لئے اعلان کردہ کیمپ میں 20 نئے کھلاڑیوں کو شامل کیا گیا ہے جو خوش گوار صورت حال ہے۔  شارٹ ٹرم منصوبہ بندی کے تحت قومی ہاکی میں بہتری نہیں لائی جاسکتی، اس کیلئے طویل حکمت عملی کی ضرورت ہے، قومی ہاکی اس وقت صفر ڈگری پر ہے، ورلڈ کپ سے ہم باہر ہیں، چیمپئنز ٹرافی اور اولمپک گیمز کا بھی حصہ نہیں ہیں ان حالات میں ہمیں بہت زیادہ محنت کی ضرورت ہے۔