کراچی (نوائے وقت نیوز) سندھ رینجرز نے سی ٹی ڈی کے ہمراہ کارروائی کرتے ہوئے شیر شاہ سے جنداللہ گروپ کے اہم دہشت گرد خان بادشاہ عرف عمر فاروق عرف خان عرف معاویہ عرف باچا عرف بہاری کو گرفتار کر لیا۔ سندھ رینجرز نے انٹیلی جنس معلومات کی بنیاد پر سی ٹی ڈی پولیس کے ساتھ شیرشاہ کے علاقے پراچہ چوک میں مشترکہ کارروائی کرتے ہوئے جنداللہ گروپ کے اہم دہشت گرد ملزم خان بادشاہ کو گرفتار کیا ہے۔ ملزم سی ٹی ڈی کی جاری کردہ ریڈ بک میں مطلوب دہشت گرد ہے جس کا تعلق جنداللہ کے حاجی ممتاز عرف حمزہ عرف جونی گروپ سے ہے۔ ابتدائی تفتیش کے دوران ملزم نے دہشت گردی کی متعدد کارروائیوں میں ملوث ہونے کا اعتراف کیا ہے۔