مکہ مکرمہ (ممتاز احمد بڈانی) طائف، الباحہ روڈ پر المناک ٹریفک حادثے میں ایک ہی خاندان کے 7 افراد سمیت 8 موقع پر جاں بحق جبکہ 6 شدید زخمی ہوگئے ہیں۔ ہلاک شدگان میں ایک بہن اور 6 بھائی  شامل ہیں، جبکہ چارسالہ بچی معجزاتی طور پربچ گئی۔ حادثے کے وقت بچی گاڑی سے اچھل کر ریت میں جاگری  اور اسے خراش تک نہ آئی۔ جبکہ والدین اور دیگر چار افراد شدید زخمی ہیں۔ ٹکر مارنے والا دوسری گاڑی کا ڈرائیور بھی موقع پر ہی دم توڑ گیا۔ متاثرہ خاندان کے عزیز محمد سالم الغامدی نے بتایا کہ میرے بھائی احمد کی فیملی مدینہ منورہ سے باحہ آ رہی تھی۔ ہلاک ہونے والے سب سے بڑے بیٹے کی عمر 17 جبکہ سب سے چھوٹا ڈھائی برس کا تھا۔ والدین اور دو بیٹیوں اور بیٹے کو طائف کے کنگ فیصل سپیشلسٹ ہسپتال، کنگ عبدالعزیز سپیشلسٹ ہسپتال اور امیر سلطان ہسپتال کے انتہائی نگہداشت کے شعبے میں علاج کے لیے داخل کرا دیا گیا۔