درجنوں وارداتیں‘ شیخوپورہ میں راہگیروں سے مقابلے میں ایک ڈاکو ہلاک

لاہور‘ شیخوپورہ‘ کھاریانوالہ‘ نواں کوٹ (نامہ نگار+ نمائندگان خصوصی) شہر کے مختلف علاقوں میں ڈاکوئوں اور چوروں نے متعدد شہریوں سے لاکھوں روپے‘ زیورات، موبائل فون، گاڑیاں، موٹر سائیکلیں اور دیگر سامان لوٹ لیا اور مزاحمت پر شہریوں سے مقابلہ میں ایک ڈاکو مارا گیا۔ سول لائن میں وقاص کے گھر گھس کر اہلخانہ کو گن پوائنٹ پر یرغمال بناکر ڈاکوؤں نے 16 لاکھ30 ہزار‘ زیورات، موبائل فون اور دیگر سامان، ڈیفنس اے میں قاسم  کی فیملی سے اسلحہ کے زور پر 3لا کھ 20ہزار روپے‘  زیورات اور موبائل فون، چوہنگ میں محسن رضا سے موٹر سائیکل، ہزاروں روپے اور موبائل فون، سندر میں صدیق سے موٹر سائیکل اور موبائل فون، کاہنہ میں اسلم سے موٹر سائیکل اور موبائل فون، ہنجروال میں عامر سے 58ہزار  اور موبائل فون، نواب ٹاؤن میں خضرحیات سے 49 ہزار اور موبائل فون، نشتر کالونی میں اختر حسین کی فارمیسی سے 45 ہزار، مصری شاہ میں رقیب سے 26 ہزار اور موبائل فون، کوٹ لکھپت میں عبداللہ کی دکان سے 25 ہزار اور موبائل فون، اسلام پورہ میں جنید سے 23 ہزار 8 سو اور موبائل فون، قائداعظم انڈسٹریل اسٹیٹ میں راشد سے 18ہزار3 سو  لوٹ لئے۔ چوروں نے ستوکتلہ میں فراز کے گھرکے تالے توڑ کر 18لاکھ 50ہزار‘ زیورات و دیگر سامان‘ گلبرگ، کاہنہ، رائے ونڈ اور نصیرآباد سے4 کاریں جبکہ گلشن راوی، اقبال ٹاؤن، ساندہ، شاہدرہ، کوٹ لکھپت، اچھرہ، نشتر کالونی، گلبرگ، شمالی چھاؤنی اور گارڈن ٹاؤن کے علاقوں سے10 موٹر سائیکلیں چوری کر لی ہیں۔ فیصل آباد روڈ کی آبادی کھاریانوالہ بنیادی مرکز صحت کے قریب دوران ڈکیتی مزاحمت پر ڈاکوئوں اور راہگیروں میں فائرنگ کا تبادلہ کے دوران ایک ڈاکو ہلاک دوسرا زخمی، تیسرا فرار ہو گیا۔  دوران گشت تھانہ بھکھی پولیس کے ڈرائیور کو دیہاتی نے کال کی کہ ہسپتال کھاریانوالہ کے قریب ڈاکو راہگیروں کو لوٹ رہے ہیں کہ اس دوران مزید دو دیہاتی آگئے جنہیں لوٹنے کی غرض سے ڈاکوئوں نے روکا تو انہوں نے مزاحمت کی تو ڈاکوئوں نے فائرنگ کر دی۔ جوابی فائرنگ سے ایک ڈاکو جاں بحق جبکہ اس کا ساتھی شدید زخمی اور تیسرا فرار ہونے میں کامیاب ہو گیا۔ بھکھی پولیس نے سب انسپکٹر یاسین کی مدعیت میں مقدمہ درج کر لیا۔