لاہور (سٹاف رپورٹر) سی آئی اے اقبال ٹاﺅن پولیس سے مبینہ مقابلے میں 2 مبینہ ڈاکو ہلاک ہو گئے جبکہ 2 ڈاکو فرار ہو گئے۔ تفصیلات کے مطابق اقبال ٹاﺅن کے علاقہ گلشن اقبال پارک کے قریب گندے نالے پر سی آئی اے اقبال ٹاﺅن پولیس کے اہلکار سب انسپکٹر رانا اکرم اور عابد یعقوب وغیرہ نے مشکوک سفید رنگ کی گاڑی کو رکنے کا اشارہ کیا تو گاڑی میں سوار چار افراد نے گاڑی بھگا دی۔ سی آئی اے اقبال ٹاﺅن پولیس کے اہلکاروں نے گاڑی کا تعاقب کیا تو کار سوار افراد نے پولیس اہلکاروں پر فائرنگ کر دی جس پر سی آئی اے پولیس کے اہلکاروں نے جوابی فائرنگ کی جس کے نتیجہ میں دو مبینہ ڈاکو ہلاک ہو گئے جبکہ دو فرار ہو گئے۔ ہلاک ہونے والے ڈاکوﺅں کے قبضہ سے دو پسٹل اور گولیاں قبضہ میں لیکر شناخت نہ ہونے پر نعشیں مردہ خانے جمع کرا دیں۔ سی آئی اے پولیس نے دعویٰ کیاہے کہ ہلاک ہونے والے دونوں ڈاکو متعدد سنگین وارداتوں میں ملوث تھے۔ دونوں مبینہ ڈاکوﺅں کی عمریں 25 سے 30 سال کے درمیان تھیں۔