خسارہ: قومی ایئرلائن کا اندرون ملک بھی متعدد روٹس پر پروازیں بند کرنے پر غور

پشاور(صباح نیوز)مالی خسارے کے باعث چترال، گلگت، اسکردو، گوادر، پسنی، ژوب روٹس پر پی آئی اے نے اپنی پروازیں بند کرنے پر غور شروع کر دیا ، پی آئی اے انتظامیہ کو چترال، گلگت، اسکردو، گوادر، پسنی، ژوب روٹس پر کروڑوں روپے کے خسارے کا سامنا کرنا پڑ رہا ہے جبکہ دیگر ایئرلائنز ان روٹس پر اپنی پروازیں نہیں چلا رہی ہیں۔ پالپا کے کیپٹن خالد کے مطابق پی آئی اے طیارے کی لیز کی مد میں ایک لاکھ روپے فی گھنٹہ سے زائد ادا کررہی ہے، امریکا روٹ کی بندش کے بعد بارسلونا، میلان اور پیرس کے روٹ بھی بند کرنا تباہ کن ہیں۔واضح رہے کہ اوپن اسکائی پالیسی کے باعث پی آئی اے کو شدید مالی خسارے کا سامنا کرنا پڑ رہا ہے حال ہی میں امریکا کیلئے بھی پروازوں کا سلسلہ بند کر دیا گیا تھا اور اب ممکنہ طور پر مزید غیرملکی روٹس کو بند بھی کیا جا رہا ہے جس سے پی آئی اے کو مزید اربوں روپے کے نقصانات کا سامنا کرنا پڑے گا۔