تتلے عالی +کامونکی(نامہ نگار،نمائندہ خصوصی)ڈکیتی و چوری کی وارداتوں میں شہری نقدی و قیمتی اشیاء سے محروم ہو گئے ۔تھانہ تتلے عالی کے علاقہ میں گزشتہ علی الصبح رضوان جٹ سکنہ عبداللہ پور گھر سے نکل کر حویلی جانے لگا تو اسی اثناء  میں تین ڈاکو  یرغمال بناتے ہوئے اس کے گھر میں داخل ہوئے اور ایک لاکھ اسی ہزار ،دو تولہ طلائی زیور لوٹ کرفرار ہوگئے۔ جبکہ تھانہ صدر کے علاقہ چھجوکی میں فلک شیر راجپوت کی حویلی سے گزشتہ رات چور دو بھیڑیں چرا کرلے گئے ۔تھانہ ایمن آباد کے علاقہ بشارت ٹاؤن کے قریب موٹر سائیکل سوار ڈاکو شفیق مغل سے72 ہزار روپے چھین کر لے گئے۔تھانہ صدر کے علاقہ درگاپور کا یوسف راجپوت موٹر سائیکل پر جارہاتھا کہ دو ڈاکو اس سے پانچ ہزار روپے چھین کر فرار ہوگئے۔ جبکہ تھانہ صدر کے ہی علاقہ موضع کہوگا کے تنویر گادی سے دو ڈاکو 46 ہزار روپے نقدی اور موبائل فون چھین کر لے گئے۔