سیاسی استحکام کے بغیر ملکی مسائل ،معیشت درست نہیں ہو سکتی:ہشام الٰہی ظہیر 

لاہور(خصوصی نامہ نگار) جمعیت اہلحدیث پاکستان کے صدر ڈاکٹر علامہ ہشام الٰہی ظہیر نے کہا سودی نظام سے نجات اور سیاسی استحکام کے بغیر ملکی مسائل اور معیشت درست سمت گامزن نہیں ہو سکتی۔ سیاستدانوں کی آپس کی ناچاقیوں سے نقصان ملک اور عوام کا ہو رہا ہے۔ اس وقت سیاستدانوں میں سیاسی بصیرت کا بڑا فقدان بھی موجود ہے۔ ان کی وجہ سے نئی نوجوان نسل سمیت عوام میں شدید مایوسی پھیل رہی ہے۔ ان خیالات کا اظہار انہوں نے گزشتہ روز جمعیت اہلحدیث کے مرکزی سیکر یٹریٹ میں اجتماع سے خطاب اور مختلف اضلاع سے آئے ہوئے جمعیت و یوتھ فورس کے عہدیدران سے گفتگو کرتے ہوئے کیا۔ علامہ ہشام الٰہی ظہیر نے کہا ریاست اور حکومت کو اپنی رٹ قائم کرنے کی ضرورت ہے۔ ابھی تک عوام کے مسائل جوں کے توں ہیں۔ ہر کوئی اقتدار کے نشے میں ایک دوسرے کی ٹانگیں کھینچنے میں لگا ہوا ہے۔ پاکستان قدرتی وسائل جیسی عظیم نعمتوں سے مالا مال ہے لیکن ہم نے کبھی اپنے وسائل کی طرف توجہ نہیں کی۔