پاکستان میں بڑھتی ہوئی دہشت گردی کےپیش نظر سی ٹی ڈی نے دہشتگردوں کے خلاف اپنی کاروائیاں تیز کردیں۔ دہشت گردی کے خدشات کے پیش نظر سی ٹی ڈی  نے پنجاب بھر میں انٹیلی جنس بیسڈ آپریشنزکے دوران 12 دہشت گرد گرفتارکرلئے ۔ ترجمان سی ٹی ڈی کے مطابق یہ کارروائیاں سرگودھا ، بھکر ، رحیم یار خان ، فیصل آباد، شیخوپورہ، ننکانہ صاحب اور جھنگ میں کی گئیں ۔ بھکر سے  ایک جبکہ سرگودھا سے  ایک انتہائی خطرناک دہشت گرد اسلحہ اور باروی مواد سمیت گرفتار کرلیا۔ ترجمان نے کہا  کہ دہشت گردوں کے قبضے سے دھماکہ خیز مواد، 7 ڈیٹونیٹر، 7 فٹ حفاظتی فیوز وائر، گولیاں اسلحہ، دو آئی ای ڈی بم ، موبائل فون ، ممنوعہ پمفلٹ اور نقدی برآمد کرلی گئی۔ ترجمان سی ٹی ڈی کا بتانا ہے کہ دہشت گردوں کی شناخت ندیم مرتضیٰ، محمد جابر ، آصف افتخار ، شمس الدین ، اعجاز حسین ، حسن خان ، شاہد سعید ، فاروق احمد کے نام سے ہوئی۔ ترجمان کے مطابق دہشت گرد مختلف مقامات پر کارروائی کر کے عوام میں خوف و ہراس پھیلانا چاہتے تھے۔ ترجمان سی ٹی ڈی  نے کہا  کہ رواں ہفتے میں 1318 کومبنگ آپریشنز کے دوران173  مشتبہ افراد گرفتار کئے جبکہ ان کومبنگ آپریشنز میں 40952 افراد سے پوچھ گچھ کی گئی۔ سی ٹی ڈی محفوظ پنجاب کے ہدف پر عمل پیرا ہے ، دہشت گردی کے ناسور کو جڑ سے اکھاڑ پھینکنے کے لئے پرعزم ہیں ۔