آئندہ برس رمضان کا مبارک مہینہ ایسے وقت آئے گا جب موسم سرما کا اختتام اور موسم بہار کا آغاز ہو رہا ہوگا اور گزشتہ سالوں کی نسبت روزے قدرے ٹھنڈے ہوں گے۔
غیر ملکی میڈیا کے مطابق آئندہ برس رمضان المبارک ماہ مارچ میں ہوگا۔ کچھ ممالک میں اس کا آغاز یکم مارچ اور کچھ کا 2 مارچ ہوگا۔
فلکیاتی حساب کے مطابق غالب گمان ہے کہ سعودی عرب، خیلجی ممالک سمیت کئی مغربی اور یورپی ممالک میں یکم رمضان آئندہ برس یکم مارچ 2025 بروز ہفتہ کو ہوگا۔
پاکستان سمیت جنوبی ایشیا کے دیگر ممالک میں جہاں عموماً اسلامی ماہ کا آغاز ایک روز بعد ہوتا ہے تو امکان ہے کہ 2 مارچ اتوار سے اس خطے میں رمضان کا آغاز ہوگا۔ تاہم اس کا حتمی تعین اس وقت چاند نظر آنے کے مطابق ہی کیا جائے گا۔
توقع ہے کہ کئی عرب ممالک مثلا سعودی عرب ، امارات ، قطر ، کویت اور مصر سمیت دنیا کے بیشتر ممالک میں رمضان کے ابتدائی ایام میں روزے کا دورانیہ تقریباً 13 گھنٹے ہو گا۔