کراچی (اسپورٹس رپورٹر)سلیم جعفر کی سربراہی میں کام کرنے  والے قومی جونیئر سلیکشن کمیٹی نے ڈومیسٹک سیزن 21-2020 میں شامل نیشنل انڈر 19 ون ڈے  اور تھری ڈے ٹورنامنٹس کیلئے چھ کرکٹ ایسوسی ایشنز کے اسکواڈز کااعلان کردیا ہے۔نیشنل انڈر19 ون ڈے ٹورنامنٹ13 اکتوبراور نیشنل انڈر19 تھری ڈے ٹورنامنٹ 5 نومبر سے شروع ہوگا۔  دونو ں ا یونٹس کے لیے چھ کرکٹ ایسوسی ایشنز کیاسکواڈز کا انتخاب اوپن ٹرائلز کے  بعد کیا گیا ہے۔چھ کرکٹ ایسوسی ایشنز کے مرکزی شہروں میں  16سے 19 ستمبر تک منعقدہ ٹرائلز میں ملک بھر سے تعلق رکھنے والے تقریباََ 7ہزار نوجوان کھلاڑیوں نے شرکت کی۔اس دوران پہلے دوروزہ اوپن ٹرائلز کے بعد ہر کرکٹ ایسوسی ایشن کے لیے  ابتدائی 40 کھلاڑیوں کو شارٹ لسٹ کیا گیا، جن کے درمیان ٹرائلز میچزکروانے کے بعد ہر کرکٹ ایسوسی  ایشن کے   20رکنی اسکواڈ کو حتمی شکل دی گئی ہے۔ان ا وپن ٹرائلز میں صرف ان کھلاڑیوں کو شرکت کی اجازت تھی جویکم ستمبر2001 یا اس کے بعد پیدا ہوئے ہیں۔