کلر سیداں (نامہ نگار) مقامی افراد نے جھاڑوفروخت کرنے والے میاں بیوی کی پٹائی کر دی جس سے خاتون زخمی ہو کر ٹی ایچ کیو ہسپتال کلر سیداں پہنچ گئی۔پولیس نے مقدمہ درج کر لیا۔صوبہ خان سکنہ بگا سنگرال نے تھانہ کلر سیداں پولیس کو بیان دیا کہ میں محنت مزدوری کرتا ہوں۔گزشتہ روز شام پانچ بجے کے قریب،میں اور میری بیوی چوکپنڈوری کے ایک گاؤں میں جھاڑو فروخت کر رہے تھے اور جب ہم گاؤں میں واقع ایک دکان کے پاس پہنچے تو وہاں 8/10 کے قریب آدمی کھڑے تھے اور دکان کا مالک بھی آ گیا جس کا بعد میں نام جاوید معلوم ہوا۔اس نے کہا کہ تم ادھر جھاڑو فروخت نہیں کر سکتے اور یہاں سے چلے جاؤجس پر میں نے کہا کہ ہم محنت مزدوری کر رہے ہیں،  آئندہ نہیں آئیں گے۔اتنے میں دیگر افراد نے گالم گلوچ شروع کر دی اور تمام نے مل کر ہمیں لاتوں مکوں سے تشدد کا نشانہ بنایا جبکہ دکاندار جاوید نے میری بیوی کو ڈنڈا مارا جو اسے دائیں ہاتھ پر لگا جس سے وہ زخمی ہو گئی۔