امریکہ سعودی عرب تعلقات خطے کی سلامتی کیلئے کلیدی حیثیت رکھتے ہیں: جوبائیڈن 

واشنگٹن (اے پی پی)امریکی صدر جو بائیڈن نے خادم الحرمین الشریفین شاہ سلمان بن عبدالعزیز آل سعود کو بھیجے گئے ایک مکتوب میں انہیں اور پوری سعودی قوم کو قومی دن  کی مبارک باد پیش کی ہے۔ العربیہ ٹی وی کے مطابق امریکی صدر نے کہا ہے کہ سعودی عرب اور امریکا کے درمیان تعلقات خطے کی سلامتی کے لیے کلیدی حیثیت رکھتے ہیں۔جو بائیڈن نے کہا کہ امریکا اور سعودی عرب کے درمیان دوطرفہ تعلقات مشرق وسطی میں استحکام ، سلامتی اور معاشی خوشحالی کا سنگ بنیاد ہیں،دونوں ممالک کے درمیان آٹھ دہائیوں پر محیط مستقل تعلقات قابل ستائش ہیں۔امریکی صدر نے کہا کہ وہ کئی شعبوں میں مشترکہ کام جاری رکھنے کے منتظر ہیں۔واضح رہے کہ سعودی عرب کا 91واں قومی دن 23ستمبر کو منایا گیاتھا۔