موبائل فون کے لیے ایک اور سفاکانہ قتل ‘ دل دہلا دینے والی ویڈیووائرل

کراچی (نیوز رپورٹر) شہر قائد میں ایک موبائل فون کے لیے ایک اور سفاکانہ قتل کی دل دہلا دینے والی ویڈیو سامنے آ گئی ہے۔تفصیلات کے مطابق کراچی کے علاقے کورنگی میں ناصر کالونی کے قریب ایک شہری کو موبائل چھیننے کی واردات کے دوران لٹیرے نے گولی مار دی۔کورنگی پولیس کے حکام کا کہنا ہے کہ موبائل فون چھینے جانے کے دوران مزاحمت پر لٹیرے کی گولی سے ایک شہری جاں بحق ہو گیا ہے، شہری کی شناخت محمد صالح کے نام سے ہوئی ہے۔سی سی ٹی وی فوٹیج میں دیکھا جا سکتا ہے کہ موبائل فون اسنیچنگ کے دوران شہری نے مزاحمت کی، جس پر لٹیرے نے بے جھجھک گولی چلا دی۔فوٹیج میں موٹر سائیکل پر سوار 2 لٹیروں کو بھی دیکھا جا سکتا ہے، لٹیروں نے گھر کے باہر کھڑے شہری محمد صالح سے موبائل فون چھینے کی کوشش کی، اور پھر مزاحمت پر اسے زندگی سے محروم کر دیا۔فائرنگ سے شہری کے زمین پر گرنے کے بعد گولی چلانے والے لٹیرے نے زمین پر گرے موبائل کو اٹھایا اور فرار ہو گیا۔ پولیس حکام کے مطابق نارتھ کراچی رشید آباد میں دوران ڈکیتی شہری کی فائرنگ سے ڈاکو زخمی ہو گیا ہے۔