کوئٹہ+ باجوڑ (نوائے وقت رپورٹ+ صباح نیوز) باجوڑ میں بم دھماکے جبکہ کوئٹہ اور کرم میں چیک پوسٹوں پر حملے میں ایک شخص جاں بحق‘ 6 زخمی ہو گئے۔ پولیس کے مطابق  باجوڑ تحصیل کے علاقے سالارزئی کے درہ بازار میں بم دھماکا ہوا جس سے ایک شخص جاں بحق اور دوسرا زخمی ہوگیا۔ زخمی کو ہیڈ کوارٹر خار ہسپتال منتقل کردیا گیا اور دھماکے کی نوعیت معلوم کی جا رہی ہے۔ پولیس نے علاقے کو گھیرے میں لے کر واقعے کی تحقیقات شروع کردی ہیں۔ کوئٹہ میں سکیورٹی فورسز کی چیک پوسٹ کے قریب دھماکا ہوا ہے جس کے نتیجے میں 2 افراد زخمی ہوگئے۔ دھماکا کوئٹہ میں چمن پھاٹک پر واقع سکیورٹی فورسز کی چیک پوسٹ کے قریب ہوا ہے۔ دھماکے کی اطلاع ملتے ہی سکیورٹی فورسز اور ریسکیو کا عملہ جائے وقوع پر پہنچ گیا اور علاقے کو گھیرے میں لے لیا گیا ہے۔ قانون نافذ کرنے والے ادارے دھماکے کی نوعیت کا تعین کرنے میں مصروف ہیں۔ پولیس حکام کے مطابق دونوں زخمی راہگیروں کی حالت خطرے سے باہر ہے۔ علاوہ ازیں کرم کے علاقے مرغان میں دہشت گردوں کے پولیس چیک پوسٹ پر حملے کے نتیجے میں تین اہلکار زخمی ہو گئے۔ پولیس کے مطابق پولیس نے بھرپور جوابی کارروائی کی جس کے نتیجے میں متعدد دہشت گردوں کے زخمی اور ہلاک ہونے کی اطلاع ہے تاہم دہشت گردوں کی ابھی تک کسی قسم کی تعداد معلوم نہ ہو سکی۔