کراچی میں تیز رفتار بس شہریوں پر چڑھ دوڑی، 2افراد جاں بحق،6زخمی

کراچی میں تیز رفتار بس شہریوں پر چڑھ دوڑی جس کے نتیجے میں 2 افراد جاں بحق اور 6 زخمی ہوگئے۔ ریسکیوحکام کے مطابق افسوسناک حادثہ سائٹ ایریا میں باوانی چالی کے قریب پیش آیا، تیز رفتار مسافر بس نے متعدد موٹر سائیکل سوار کو روند ڈالا، واقعہ میں ایک موٹر سائیکل سوار اور راہ گیر شہری جاں بحق اور 6 افراد زخمی ہوگئے۔واقعہ کی اطلاع ملتے ہی ریسکیو ادارے موقع پر پہنچے اور امدادی کاموں کا آغاز کردیا، ریسکیو رضاکاروں نے واقعہ میں جاں بحق افراد کی لاشوں کی ضابطے کی کارروائی اور زخمیوں کو طبی امداد کی فراہمی کے لئے ہسپتال منتقل کردیا۔حادثے کے بعد بس ڈرائیور موقع سے فرار ہوگیا جب کہ عوام اپنے طور پر اس کی تلاش شروع کردی۔