لاہور (نمائندہ سپورٹس) پاکستان تائیکوانڈو فیڈریشن (پی ٹی ایف) نے رواں برس شیڈول ریو اولمپکس گیمز کے سلسلے میں ایشین کوالیفکیشن ٹورنامنٹ کیلئے مردوخواتین ٹیموں کا اعلان کر دیا۔ پانچ رکنی مینز اور تین رکنی ویمنز ٹیم سینئر ایشین تائیکوانڈو چیمپئن شپ اور چوتھی ایشین پومسائی چیمپئن شپ میں اپنی صلاحیتوں کے جوہر دکھائیں گی، ایونٹ 14 سے 20 اپریل تک، منیلا فلپائن میں کھیلا جائے گا۔ پی ٹی ایف کے سیکرٹری جنرل مرتضیٰ حسن بنگش مینز جبکہ ممتاز نور ویمنز ٹیم کی سربراہی کریں گے۔ مسرور زمان دونوں ٹیموں کے مینجر ہوں گے، ملائیشیا کے ٹیوکوانگ لو مینز اور محمدسہیل علی خان ویمنز ٹیم کی کوچنگ کریں گے۔ پی ٹی ایف کی طرف سے اعلان کردہ مینز ٹیم محمدفہیم، عاطف ارشد، الطاف عزیز، ملک اعظم خان اور یاسرجاوید پر مشتمل ہے جبکہ ویمنز ٹیم میں یاسمین مریم خان، ناجیہ رسول اور عائشہ نور شامل ہیں۔