کھلونوں کی دکان اورکوارٹرمیں آتشزدگی ،40سالہ شخص جھلس کر جاں بحق 

لاہور(نامہ نگار)چوہنگ کے علاقے میں ایک کوارٹر میں آتشزدگی کے نتیجے میں 40سالہ شخص جھلس کر جاں بحق ہو گیا ہے۔ تفصیلات کے مطابق تھانہ چوہنگ کے علاے میں جناح ٹرمینل کے قریب بابر عمارکے کوارٹر میں شارٹ سرکٹ کے باعث آگ بھڑک اٹھی۔ جس کے نتیجے میں40 سالہ بابرجھلس کر موقع پر ہی جاں بحق ہو گیا ہے۔اطلاع ملنے پر ریسکیو ٹیموں نے موقع پر پہنچ کر امدادی کارروائیاں کرتے ہوئے آگ پر قابو پالیا ہے۔ ریسکیوذرائع کے مطابق آگ شاٹ سرکٹ کے باعث لگی ہے۔اطلاع ملنے پر پولیس نے موقع پر پہنچ کر نعش قبضے میں لے کر پوسٹ مارٹم کے لئے مردہ خانے منتقل کر کے قانونی کارروائی کا آغاز کر دیا ہے۔علاوہ ازیں داتا دربار کے علاقے میں پیر مکی والی گلی میں کھلونوں کی دکان اور اس کی بالائی منزل پرآگ لگ گئی۔ ریسکیو ذرائع کے مطابق آگ شارٹ سرکٹ کے باعث لگی، جس سے لاکھوں کا سامان جل گیا، تاہم تمام دکاندار محفوظ رہے۔