اسلام آباد (خبر نگار) پاکستان مسلم لیگ ن کے صدر میاں محمد شہباز شریف نے کہا ہے کہ عمران خان اپنی شکست کو تسلیم کرنے کے بجائے قوم کو تقسیم کرنے کی سازش کر رہے ہیں، اپنے طرز عمل اور دھمکیوں کے ذریعے قوم کو تقسیم کر رہے ہیں۔ غداری کا مقدمہ سب سے پہلے آپ کے خلاف درج ہونا چاہیے۔ نیوز کانفرنس کے دوران پاکستان مسلم لیگ ن کے صدر کا کہنا تھا کہ عدم اعتماد کی ساری سٹرٹیجی آخری مرحلے میں کامیابی سے ہمکنار ہو گی، عمران نیازی اپنی شکست ماننے کے بجائے قوم کو تقسیم درتقسیم کرنے کی بھیانک سازش کرنے میں مصروف ہے۔ یہ تمام آئینی اداروں کا فرض ہے تمام اقدامات اٹھائیں۔ عمران نیازی آئین وقانون کے راستے پرچلنے سے انکاری ہے۔ انہوں نے کہا کہ سپریم کورٹ کے فیصلے کے مطابق ووٹ کا حق ملنا چاہیے، امید کرتا ہوں پرامن ماحول اورعمران خان کو تھوک کو چاٹنا ہو گا، ’بیگرز کانٹ بھی چوزر’ یہ بات پہلی مرتبہ نہیں کی، یہ بات بیسیوں مرتبہ کر چکا ہوں، بعض کرم فرماؤں نے میری بات کو ٹوئسٹ کرنے کی کوشش کی، شہباز شریف کا کہنا تھا کہ اپنے بھکاری والے بیان پر قائم ہوں، اگر کوئی قوم معاشی طور پر محکوم ہے تو اس کی سیاسی آزادی بے معنی ہے، 74سال ہو گئے معاشی لحاظ سے آزاد نہیں ہیں، قرضوں پر قرض لیے جاتے ہیں، اگر ہم نے ایک آزاد قوم کی طرح زندہ رہنا ہے تو کشکول کو توڑنا ہو گا، کشکول توڑنا کوئی آسان کام نہیں ہے۔ لیگی صدر کا کہنا تھا کہ کسی جادو، ٹونے سے نہیں دن رات محنت سے جاپان، جرمنی نے اپنا مقام بنایا، جرمنی کو تقسیم کر دیا گیا تھا، مغربی جرمنی کی اکانومی، خوشحالی سے دیوار برلن منہدم ہو گئی تھی، مشرقی اور مغربی جرمنی ایک ہو گئے تھے، یہی وہ فارمولا ہے اسی طرح کشمیر ہماری جھولی میں آئے گا، اگر جرمنی ایک بیگر ہوتا تو کیا مغربی جرمنی کی جھولی میں گرتا، قرضوں سے نکلنا ہو گا، اس تناظرمیں ہمیشہ یہ بات کی، میری بات کو ٹوئسٹ کرنا درست بات نہیں تھی، میری بات کوامریکا سے کونیکٹ کردیا گیا۔ اپنی بات کو جاری رکھتے ہوئے ان کا کہنا تھا کہ عمران نیازی کو اس کا مکروہ چہرہ دکھانا چاہتا ہوں، 2011میں ڈرون حملوں کے نیتجے کی وجہ سے پنجاب حکومت نے امریکا کی ایڈ سے انکار کیا تھا، آپ نے تو کہا تھا آئی ایم ایف نہیں جاؤں گا خود کشی کر لوں گا، شہباز شریف کا کہنا تھا کہ قطر، چین کو آپ نے بدنام کیا، کس کو عمران نیازی بھاشن سنارہے ہو، قوم کو برباد کردیا، غداری کا کیس اگر بنتا ہے تو تم پر بنتا ہے، پی ٹی آئی دھرنوں کے دوران چینی صدرکا دورہ موخر ہوا، تم پرغداری کا مقدمہ بنتا ہے، دھرنے کی وجہ سے سی پیک معاہدہ موخرہوا تھا، غداری کا مقدمہ سب سے پہلے آپ کے خلاف درج ہونا چاہیے۔ نیشنل سکیورٹی کونسل میں تین ہفتے بعد خط لیکر آئے پہلے سوتے رہے، اوآئی سی میٹنگ میں امریکی وفد کوبلایا گیا، آپ نے کہا امریکا اورپاکستان کے تعلقات کوسیلبریٹ کریں گے، خط 7 مارچ کو آیا تھا تو پھر امریکا کی تعریف کرنے کی کیا ضرورت تھی، یہ چاہتا ہے ’نا کھیڈا گے نا کھیڈن دیاں گے‘۔ آپ نے سعودی عرب کے ساتھ تعلقات کو بھی بگاڑ دیا، بال ٹمپرنگ آپ کے زمانے میں شروع ہوئی، عمران نیازی نے آج پھر لوگوں کو اشتعال دلایا، مسلم لیگ (ن)کے کارکن پرامن رہیں، اگرعمران نیازی نے آئین کے ساتھ ٹکراؤ والی صورتحال پیدا کی توقانون اپنا راستہ اپنائے گا۔ پاکستان مسلم لیگ (ن) کے صدر اور قائد حزب اختلاف شہباز شریف کا رمضان المبارک پر تمام اہل ایمان کو مبارک اﷲ تعالیٰ رمضان المبارک کے مقدس مہینے طفیل پاکستان اور امت مسلمہ کے مسائل دور کر دے۔ عوام کو سستی و معیاری اشیاء کی فراہمی‘ ناجائز منافع خوری اور مہنگائی سے بچانے کیلئے اقدامات کرنا ہوں گے۔