حضرت خدیجہ الکبریٰ ؓنے تبلیغ اسلام میں کلیدی کردار ادا کیا:اشرف آصف جلالی

 لاہور(خصوصی نامہ نگار) تحریک لبیک یارسول اللہ کے سربراہ اور تحریک صراط مستقیم کے بانی ڈاکٹر محمدا شرف آصف جلالی نے ام المومنین حضرت سیدہ خدیجہ الکبریٰؓ کے یومِ وصال کے موقع پر انہیں خراج تحسین پیش کرتے ہوئے کہاکہ اللہ تعالیٰ نے مقامِ نبوت کی معرفت اور مقصد رسالت کیلئے ان تھک جد وجہد میں حضرت خدیجہ الکبریٰؓکو سبقت عطا فرمائی۔ حضرت خدیجہ الکبریٰؓ نے تبلیغ اسلام کے سلسلہ میں کلیدی کردار ادا کیا۔ دین اسلام کی سر بلندی کیلئے آپ نے صرف اپنا مال ہی خرچ نہیں کیابلکہ اپنی جان تک کی بھی پرواہ نہیں کی۔ رسول اللہ کی رفیقہ حیات ہونے کے لحاظ سے آپ کا مقام و مرتبہ بہت بلند ہے۔ اہل بیت رسول میں آپ ایک منفرد مقام کی حامل ہیں۔ رسول اکرم کی چاروں صاحبزادیاں آپ ہی کے بطن مبارک سے پیدا ہوئیں۔ رسول اللہ کی طرف سے کارِ نبوت کی ادائیگی میں حضرت خدیجہ الکبریٰؓ کے مشوروں کا بڑا حصہ ہے۔ سیدہ خدیجہ الکبریؓ نے تبلیغ اسلام کے پہلے محاذ پر حق کا پرچم بلند کیا۔ ام المو¿منین حضرت خدیجہ الکبریٰؓ کے ملت اسلامیہ پر احسانات کبھی فراموش نہیں کیے جاسکتے۔ نزولِ وحی کے بعد پیغمبر اسلام کے ساتھ اظہارِ حق کی خاطر جس کے قدم اٹھے وہ آپ ہی عظیم خاتون ہیں۔